पहिचान

21/6/10
छिमेकी सुगाको रटाइ
'अन्धोन्माद'मा
बाबाको उपदेश
र
आमाको लोरी,
चौकोशभित्रै चिहान खनेर
भूतलमा गाड्न उद्धतहरु
कुलको ईतिहास उपहास गर्दै
जमातमा डुक्रिँदैछन,
मैले
आफ्नी आमाको लाम्टोलाई
पूजा गर्दा मेरो प्रार्थनाको दोहोलो काढिन्छ
तर म जान्दछु सबै डुक्रिनेहरु
पवित्र मन्दिर रुङ्ने शिवका साँढे हुँदैनन्\

गिदिको मोहनभोग
'सतही स्वादमा'
खोपडिको घोटाइ
र
साधनाको उचाइ,
मझेरिमै धुनी बालेर
आगो ताप्न अभ्यस्तहरु
हूलका हूल अट्टहास गर्दै
चरुको नाममा डढाउँदैछन्,
मैले
आफ्नै ईतिहासको पानालाई
छातीमा टाँस्दा असह्य भिड चिच्याउँछन्
तर म जान्दछु सबै भिडको चिच्याहटमा
साधनाको अनवरत शिंहनाद् हुँदैन\

सबै अप्ठ्यारा गोरेटाहरुले
थोरै बटुवाको पैताला छुन्छन्
अग्ला पर्बतका चुचुराहरुले
थोरै साहसीलाई अङ्कमाल गर्छन्
दर्शनका घनघस्या उक्लिन
कठोर खुड्किला टेक्नुपरेझैँ
साँच्चै ,,
आमाको खास्टो जोगाउन पनि
सँधियारको पटुकी चोरेर कहाँ हुन्छ??

मलाई थाहा छ पराइको तानमा
पहिचानको रेशमी धर्सो हुँदैन।