परदेशी झरी ।

भीषण हावा हूण्डरि सहितको बर्षा
अलिक थामिएको बेला
म झ्यालको फक्लेटाबाट
धुम्मिएको आकाश चिहाउँदै छु ,,,
धुमिल केही आकृतिहरु
मनमा हो
या,
बादलमा !!
ठम्म्याउन खोज्छु…
घरी घरी हुत्तिँदै 'त्यहीँ' पुग्छ यो मन
फेरी फर्केर 'यहीँ' आइपुग्छ
भाबनाको सम्बेगी लहर,
लाग्छ फेरी तुरुन्तै बादल बर्सिनेछ
फेरी आकाश दर्किनेछ
मेरै परेलिको डिल नाघेर
ओइरिने झरी जस्तो
बेसुरा र बेठेगानको !!
उफ्फ्फ्फ!
यो झरी उसैगरी बर्सिन्छ
जसरी 'त्यहाँ'असार-सावन रुन्छ
तर यहाँ 'अर्कैको' आकाशबाट झर्छ
'अर्कैको' धर्तिमा खस्छ ,,,
त्यसैले त अर्कै अर्कै लाग्छ ,,
यो परदेशी झरी ।