//प्रेमपत्र/

//प्रेमपत्र//


बिस्मित निर्लिप्त आँखाहरु
आशा भरी मन् हरु,
सुस्केरा ,उच्छ्वास
मलिन अनुहार ..
खग्रास ग्रहण को अन्धकारमा
अन्दाजले छाम्छाम छुम्छुम गर्दै
म लेख्दैछु प्रेमपत्र ...

बिखण्डित बस्तीहरु
पलायनप्राय: जीवन ,
डढेलोपछिको
निसाध् धुँवाको मुस्लो ..
कालो निलो अँगार अनी अनुहार
तिनै बर्बादिको कहानी टिपी
म लेख्दैछु प्रेमपत्र ...

अहिँसा शान्ती र बुद्ध
कण्ठस्त ,, मनको कुनामा थुनेर
क्षत् बिक्षत टाउका र गिँडहरु गन्दै
तिनैका हिसाब किताब समेटी
अश्रुपुरित नयन संगै
रणभूमि को छातीबाट
म लेख्दैछु प्रेमपत्र ...

आक्रान्त मन ,
त्रसित आत्माहरु
बिचलित आज र अनिस्चित भोली बिच
सम्भावनाको खडेरिमा
धुमिल सपनाहरु बटुलेर
नुनिलो आँशुको बुंद बुंदले
म लेख्दैछु प्रेमपत्र ...

प्रिय!! तिम्रो अपेक्षा बिपरित,
तिम्रो आकांक्षा को उल्टो
तिम्रो कल्पनाको साटो
एक अकल्पनिय ,ह्रदयबिदारक ,,
प्रणय र माधुर्यता भन्दा टाढा
तितो यथार्थ तर ऐतिहासिक..
म लेख्दैछु प्रेमपत्र ...

तर ,,तर
यो अन्तिम हुनेछ
यो समाप्ती हुनेछ
यो पूर्णबिराम हुनेछ
यो ध्वंस र बितण्ड
धोखा र बर्बादी काहानीको ,,
यो पत्र अन्तिम हुनेछ...

आशा छ ..
फेरी मायाका कुरा लेखुँला
प्रणय का प्रेमिल कुरा लेखुँला
सपना र रहर अनी ..
सम्भावनाका मिठा शब्दहरु लेखुँला
बस् अहिलेलाई ,,
मुटुमाथी ढुङ्गा राखी
आशु र रगतको मिश्रणले
म लेख्दैछु प्रेमपत्र ।।।